Nima bo‘ldi?

Ukraina janubi-sharqida ukrain tomoni va mamlakatning bir qismini o‘z nazorati ostida saqlab turgan rossiyaparast ayirmachilar o‘rtasidagi qarama-qarshilik yana keskinlashdi, deb yozadi Meduza.
Minsk kelishuvi yakunlari bo‘yicha sulhga rioya etilishini kuzatib borayotgan Yevropada xavfsizlik va hamkorlik tashkiloti (YXHT) missiyasi ma’lumotlariga ko‘ra, 2017-yil yanvarining so‘nggi kunlarida kuzatuvchilar tomonidan qayd etilgan portlashlar soni keskin ko‘paygan. 22-28-yanvar kunlari oralig‘ida missiya a’zolari kuniga o‘rtacha 382 ta portlashni qayd etgan bo‘lsa, 28-yanvar oqshomidan 29-yanvar oqshomiga qadar 2240 ta, keyingi bir sutka davomida esa 2499 ta portlashni ro‘yxatga olgan.
O‘qqa tutishlar asosan Ukraina qo‘shinlari tomonidan nazorat qilinayotgan Avdeyevka va rossiyaparast ayirmachilar nazorati ostida bo‘lgan Donetsk shaharlari atrofida olib borilmoqda. O‘qqa tutishlar natijasida qancha tinch aholi vakili halok bo‘lgani haqida ishonchli ma’lumotlar yo‘q. YXHT faqat o‘z kuzatuvchilari qayd eta olgan ma’lumotlarga asoslangan bo‘lib, bu hisobotlarda qurbonlar va yaralanganlar haqida axborot kam. Ukraina harbiylari va rossiyaparast ayirmachilar orasida qurbonlar qancha ekanini ham bilmaymiz. Tomonlar o‘z qurbonlari sonini kamaytirib, dushmanining yo‘qotishlari ko‘lamini ko‘paytirib, bir-biridan farqli ma’lumotlarni keltirmoqda.

Qator nashrlar Avdeyevka va Donetskda gumanitar inqiroz yuz bergani haqida yozmoqda. Bu rostmi?

Bilmaymiz. Ukraina hukumati 30-yanvar kuni Avdeyevkada gaz ham, elektr ham, suv ham yo‘qligini ta’kidlagan edi. 1-fevral kuni gaz va suv paydo bo‘ldi. Shunga qaramay, shaharda ixtiyoriy evakuatsiya e’lon qilingan.
Donetskda esa, mahalliy ma’muriyat axborotiga ko‘ra, 1-fevral kuni shaharliklar suvsiz qolgan – snaryadlardan biri filtr stansiyasiga kelib tushgan. Ayni vaqtda, Meduza nashrining Donetskdagi o‘quvchisi shaharda suv borligini ma’lum qildi. Twitter’da ham Donetskda suv borligi, lekin jadal oqmayotgani haqida xabarlar uchraydi.

Ekologik inqiroz haqida ham xabarlar paydo bo‘ldi. Bu rostmi?

Bilmaymiz. Bu xabarlar Avdeyevkadagi koksoximiya zavodining o‘qqa tutilgani bilan bog‘liq. Korxona rahbariyati bergan bayonotga ko‘ra, zavod avvalgidek ishlab turibdi – agar zavod to‘g‘ridan-to‘g‘ri o‘qqa tutilishdan omon qolsa, hammasi yaxshi bo‘ladi.

Nimaga hech narsani bilmaysiz?

Biz hech narsani bilmaymiz, chunki ma’lumotlariga ishonsa bo‘ladigan manbalar yo‘q. Biz na Ukraina hukumatiga va na rossiyaparast ayirmachilarga ishonamiz – ularning ikkisi ham bir-biri bilan nizolashayotgan tomonlardir. Jangovar harakatlar hududida deyarli jurnalist yo‘q – borlari ham to‘qnashuvlarni faqat Rossiya nuqtai nazari bilan yoki faqat Ukraina nuqtai nazari bilan yoritmoqda. Donetskda va Ukrainada xalqaro axborot agentliklarining muxbirlari bor, lekin ular ham jarayonni faqat rasmiylarning so‘zlariga asoslangan holda kuzatmoqda. Eng asosiy ma’lumot – qurbonlarning aniq soni haqida hozir bilishning hech qanday imkoni yo‘q.шаблоны для dle 11.2