“Tachmurod Agamurodovning iste’fosi viloyat hokimining shaxsiy munosabatiga bog‘liq emas”. “Buxoro” rahbariyati klub atrofidagi gap-so‘zlarga munosabat bildirdi
666

“Tachmurod Agamurodovning iste’fosi viloyat hokimining shaxsiy munosabatiga bog‘liq emas”. “Buxoro” rahbariyati klub atrofidagi gap-so‘zlarga munosabat bildirdi





“Buxoro” futbol klubi o‘tgan yilgi milliy futbol mavsumining sensatsiyalaridan biri bo‘ldi — bir yil avval bazo‘r Oliy Ligada jon saqlab qolgan jamoa 2016-yil davomida Osiyo Chempionlar Ligasi yo‘llanmasi uchun kurash olib bordi (lekin yo‘llanmani qo‘lga kirita olgani yo‘q).

Jamoa bunday muvaffaqiyatga o‘z-o‘zidan erishgani yo‘q — 2016-yilgi mavsum oldidan klubga bir qator taniqli futbolchilar jalb etildi, bundan avvalroq, 2015-yilning ikkinchi davrasida klub murabbiylar shtabida bungacha “Paxtakor”, “Lokomotiv”, “Dinamo”, “Sho‘rtan” klublarida ishlagan turkmanistonlik mutaxassis — Tachmurod Agamurodov ish boshlagan edi.
23-yanvar kuni nafaqat Tachmurod Agamurodov, balki klubning butun murabbiylar shtabi iste’foga chiqarildi. Bu vaqtgacha jamoa yetakchisiga aylanib ulgurgan bir qator futbolchilar klubni tark etib ulgurgan edi. Bu xabarlar “Buxoro”dagi “futbol ertagi” yakuniga yetdi, degan taassurot uyg‘otmay qo‘ymasdi.
Ayni vaqtda, ijtimoiy tarmoqlar jarayon bilan bog‘liq boshqa bir tasodifiy holatga ham e’tibor qaratgan — Buxoroning yangi hokimi 2008-yili Samarqand viloyatiga rahbar bo‘lib kelgach, o‘sha vaqtda “Dinamo”da ishlayotgan Agamurodov bir oydan so‘ng iste’fo bergan; bu safar shu holat Buxoroda takrorlandi.
“Buxoro” rahbariyati klub atrofida paydo bo‘layotgan “asossiz gap-so‘zlar”ning oldini olish maqsadida, “Daryo” internet-nashriga murojaat yo‘lladi. Unda Agamurodov ham a’zosi bo‘lgan murabbiylar shtabining iste’foga chiqarilishi sabablari, shuningdek, klubning yangi rivojlanish strategiyasi haqida so‘z boradi.
Aksariyat muxlislarda chempionatda 4-o‘rinni egallagan jamoa murabbiylar shtabi nega ishdan chetlatildi, degan savol tug‘ilishi mumkin.
Birinchidan, har qanday mutaxassis ishga qabul qilinganda uning oldiga ma’lum talablar qo‘yiladi. Mutaxassis ham mavjud talablarni amalga oshirish uchun o‘z shartlarini o‘rtaga tashlaydi.
2016-yilgi mavsum avvalida jamoa murabbiylar shtabi oldiga Osiyo Chempionlar Ligasi yo‘llanmasini qo‘lga kiritish vazifasi qo‘yildi. Bu borada jamoaga barcha sharoitlar yaratib berildi. Murabbiylar talabiga asosan yulduz futbolchilar tarkibga jalb etildi. Ammo natija-chi?! Mavsum yakuniga ko‘ra jamoa OChL yo‘llanmasini qo‘lga kirita olmadi. Mazkur holatning o‘ziyoq murabbiylar shtabi rahbariyatning talabini qondira olmaganligi hamda iste’foga loyiqligini ko‘rsatadi.
Ikkinchidan, 2016-yilgi mavsumdagi “Buxoro” futbol klubi byudjeti Oliy Ligada faoliyat yuritayotgan klublar o‘rtasida 2-o‘rinni egallagan. Ammo turnir jadvalidagi yakuniy pog‘ona — 4-o‘rin.
Bu holat klub rahbariyati tomonidan pullarni behuda sovurish, kerak bo‘lsa, talon-toroj qilish sifatida baholandi.
“Buxoro” PFK murojaatidan
“Buxoro” rahbariyatining qayd etishicha, klub o‘z rivojlanish strategiyasini qayta ko‘rib chiqqan va endi asosiy e’tibor yoshlarga qaratiladi.
Endilikda faqatgina katta mablag‘, baland maosh evaziga jamoadan jamoaga ko‘chib yuruvchi “yulduz” o‘yinchilar bilan natijaga erishib bo‘lmasligini anglagan klub rahbariyati o‘z rivojlanish strategiyasini o‘zgartirib, mahalliy yoshlar evaziga bosqichma-bosqich taraqqiyot yo‘lini tanladi.
Jamoada buxorolik futbolchilar orasida kim muntazam o‘yin amaliyotiga ega bo‘ldi? Faqatgina Shavkat Salomov va qisman Jasur Hasanov. Suhrob Ne’matov zaxiradan maydonga tushdi; Bobir Amonov, Jamoliddin Ubaydullayev, Nozim Umurov singari futbolchilar esa, bir-ikki o‘yinni aytmasa, zaxira o‘rindig‘ini “isitdi”. Jamoaga o‘rinbosarlar tarkibidan hech kim jalb etilmadi.
Negaki, asosiy e’tibor faqatgina “yollanma” futbolchilar evaziga natijaga erishishga qaratilib, yoshlar bilan ishlash unutildi. Oqibatda esa jamoa kelajagi xavf ostida qoldi. Shu bois ayni paytda viloyatdagi ayrim muxlislar jamoaning keyingi yildagi ishtirokidan xavotir olmoqda. Agar klub murabbiylar shtabi o‘z vaqtida yoshlar bilan ishlashga ham e’tibor qaratganida, bugun mazkur xavotirlarga o‘rin qolmasdi.
Shu bois, ayni paytda viloyatda futbolni mahalliy yoshlar hisobiga kuchaytirishga e’tibor qaratildi. Mablag‘ ham ana shu maqsadga yo‘naltirildi. Tabiiyki, bunday vaziyatda katta maoshga o‘rgangan futbolchilar o‘z xohishiga ko‘ra jamoani tark etadi.
“Buxoro” PFK murojaatidan
Klub murojaatida alohida qayd etilishicha, Tachmurod Agamurodovning iste’fosi bilan viloyatga yangi hokim tayinlanuvi o‘rtasida hech qanday bog‘liqlik yo‘q.
Xulosa qilib aytganda, Tachmurod Agamurodovning iste’fosi viloyat hokimi shaxsiy munosabati bilan emas, balki sohada tartib o‘rnatish maqsadida amalga oshirildi. Iste’foning asosiy sababi — avvalo belgilangan natijaga erishilmaganligi, qolaversa, jamoa o‘yinini bir martalik tarkib hisobiga tuzib, uning kelajagiga e’tibor qaratilmaganligida. Bu holatdan esa rahbariyat qoniqmasdan, uni iste’foga chiqardi.
“Buxoro” PFK murojaatidan
Avvalroq “Buxoro” futbol klubiga Buxoro futboli tarbiyalanuvchisi Ulug‘bek Baqoyev bosh murabbiy etib tayinlangani haqida xabar berilgan edi. Unga O‘zbekiston milliy terma jamoasining sobiq bosh murabbiyi Vadim Abramov ma’lum muddat yordam beradi.шаблоны для dle 11.2
Manba:Daryo

Behruz 2017-02-01



Top 10
Статистика