O‘zbekiston Birinchi Prezidenti Islom Karimov tavallud sanasi munosabati bilan mamlakat bo‘ylab turli tadbirlar bo‘lib o‘tmoqda
849

O‘zbekiston Birinchi Prezidenti Islom Karimov tavallud sanasi munosabati bilan mamlakat bo‘ylab turli tadbirlar bo‘lib o‘tmoqda





O‘zbekiston Birinchi Prezidenti Islom Karimov tavallud sanasi munosabati bilan mamlakat bo‘ylab turli tadbirlar bo‘lib o‘tmoqda. Bu haqda O‘zA xabar bermoqda.

O‘zbekiston Prezidenti Shavkat Mirziyoyev 25-yanvar kuni “O‘zbekiston Respublikasining Birinchi Prezidenti Islom Abdug‘aniyevich Karimovning xotirasini abadiylashtirish to‘g‘risida”gi qarorni imzolagan edi.
Mirzo Ulug‘bek nomidagi O‘zbekiston Milliy universitetida Islom Karimov tavallud topgan kun munosabati bilan o‘tkazilgan tadbirda universitet rektori A.Marahimov, akademik M.Salohiddinov, adabiyotshunos Sh.Rizayev va boshqalar xalqning tinch va farovon hayoti, mamlakatning barqaror iqtisodiy ravnaqi uchun borlig‘ini, umrini bag‘ishlagan, jahon miqyosida katta obro‘-e’tibor qozongan buyuk davlat va siyosat arbobi Islom Karimovning beqiyos xizmatlarini yoshlar ongu qalbiga singdirish katta tarbiyaviy ahamiyatga ega ekanini ta’kidladi.
Islom Karimov nomidagi Toshkent davlat texnika universitetida tashkil etilgan tadbirda oliy va o‘rta maxsus ta’lim vaziri o‘rinbosari M.Karimov, universitet rektori F.Rizayev, O‘zbekiston Yozuvchilar uyushmasi raisi M.Ahmedov, Olmazor tumani hokimi B.G‘oyibnazarov va boshqalar Islom Karimov o‘zining serqirra siyosiy faoliyati, olijanob insoniy fazilatlari bilan O‘zbekistonning ko‘p asrlik tarixida yorqin iz qoldirganini ta’kidladi.
O‘zbekiston Respublikasi Ichki ishlar vazirligi madaniyat saroyida “Islom Karimov – O‘zbekiston Respublikasi mustaqilligining asoschisi” nomli ma’naviy-ma’rifiy tadbirda Islom Karimovning davlat va siyosat arbobi sifatidagi keng qamrovli faoliyati yana bir bor e’tirof etildi.
O‘zbekiston Yozuvchilar uyushmasi raisining birinchi o‘rinbosari S.Sayyid, O‘zbekistonda xizmat ko‘rsatgan jurnalist Q.Karimbekov va boshqalar Prezident Shavkat Mirziyoyev boshchiligida Islom Karimov xotirasining abadiylashtirilayotgani butun O‘zbekiston xalqining dilidagi ezgu istak ekanini ta’kidladi.
Alisher Navoiy nomidagi O‘zbekiston Milliy kutubxonasida “Mustaqilligimiz fidoyisi” mavzuida davra suhbati bo‘lib o‘tdi. Tadbirda istiqlol yillarida O‘zbekistondagi tinchlik va barqarorlik, mehr-oqibat va bag‘rikenglik, millatlararo totuvlikni asrab-avaylash, mustaqillikni mustahkamlashdek buyuk ishlar Islom Karimov nomi bilan chambarchas bog‘liq ekani ta’kidlandi.
Tadbirkorlar va ishbilarmonlar harakati – O‘zbekiston Liberal-demokratik partiyasi siyosiy kengashi ijroiya qo‘mitasi, partiyaning Oliy Majlis Qonunchilik palatasidagi fraksiyasi va Toshkent shahridagi Turin politexnika universiteti hamkorligida o‘tkazilgan tadbirda Birinchi Prezident tashabbusi bilan yoshlar huquq va manfaatlarini ta’minlashning huquqiy, tashkiliy asoslari yaratilgani, ularning iste’dodini rag‘batlantirish va qo‘llab-quvvatlashning mustahkam mexanizmi shakllantirilgani haqida yoshlarga so‘zlab berildi.
Toshkent kimyo-texnologiya institutida O‘zbekiston Xalq demokratik partiyasi Toshkent shahar kengashi tomonidan tashkil etilgan tadbir “Kelajagi buyuk yurtning Birinchi Prezidenti – Siz doimo qalbimizdasiz!” deb nomlandi.
Institut rektori S.Turobjonov, O‘zbekiston Xalq demokratik partiyasi Toshkent shahar kengashi raisi o‘rinbosari N.Yo‘ldosheva va boshqalar O‘zbekiston Birinchi Prezidenti yosh avlodga muntazam g‘amxo‘rlik ko‘rsatganini ta’kidladi.
Qibray tumanidagi “Do‘rmon” madaniyat saroyida o‘tkazilgan madaniy-ma’rifiy tadbirda yoshlarga O‘zbekiston Birinchi Prezidenti rahnamoligida shaharu qishloqlarda ro‘y bergan olamshumul o‘zgarishlar, fuqarolar kayfiyati, bugungi hayotdan mamnunligi hamda mustaqillikkacha bo‘lgan davrdagi og‘ir kunlar haqida so‘zlab berildi.
Farg‘ona davlat universitetida Islom Karimovning hayoti va faoliyati, boy ma’naviy merosiga bag‘ishlab o‘tkazilgan ilmiy anjumanda Birinchi Prezident bilan bog‘liq O‘zbekistonning istiqlol yillarida erishgan ulkan yutuq va natijalari, barcha sohalarda olib borilgan islohotlar samaralari haqida so‘z bordi. U kishining fidoyilik, vatanparvarlik, adolatparvarlik, samimiylik, mehribonlik kabi olijanob fazilatlari barcha uchun yorqin ibrat namunasi ekani ta’kidlandi.
Andijon bank kollejida O‘zbekiston Xalq demokratik partiyasi viloyat kengashi hamda viloyat o‘rta maxsus, kasb-hunar ta’limi boshqarmasi hamkorligida o‘tkazilgan tadbir “Buyuk Yo‘lboshchiga hamisha ta’zimdamiz” deb nomlandi.
O‘zbekiston Birinchi Prezidenti Islom Karimov tavalludi sanasi – 30-yanvar kuni munosabati bilan butun mamlakat bo‘ylab turli tadbirlar davom etmoqda.
шаблоны для dle 11.2
Manba:Daryo

Behruz 2017-01-31



Top 10
Статистика